ກ່ຽວກັບ ຄອສ ສານຈາກທ່ານ ຄະນະບໍດີ ຄອສ

ສານຈາກທ່ານຄະນະບໍດີຄະນະອັກສອນສາດ

ສະພາບລວມຂອງຄະນະອັກສອນສາດ:

ຄະນະອັກສອນສາດມີຊື່ຫຍໍ້ວ່າ: “ຄອສ” ເປັນຄະນະວິຊາໜຶ່ງທີ່ຂຶ້ນກັບສະຖາບັນການສຶກສາຊັ້ນສູງລະດັບຊາດຂອງລາວ ທີ່ເອີ້ນກັນວ່າ "ມະຫາວິທະຍາໄລແຫ່ງຊາດ" ຄະນະອັກສອນສາດມີທີ່ຕັ້ງຢູ່ວິທະຍາເຂດດົງໂດກເປັນແຫຼ່ງສ້າງຊັບພະຍາກອນ ມະນຸດດ້ານພາສາສາດ ພ້ອມທັງເປັນບ່ອນເຜີຍແຜ່ດ້ານພາສາ ແລະ ວັດທະນະທຳລາວໃຫ້ແກ່ຊາວຕ່າງ ປະເທດໄດ້ຮັບຮູ້. ນັກສຶກສາທີ່ຮຽນພາສາຕ່າງປະເທດບໍ່ພຽງແຕ່ໄດ້ຮູ້ພາສາຂອງປະເທດນັ້ນໆ ຍັງໄດ້ຮັບຮູ້ປະຫວັດສາດ ແລະ ວັດທະນະທຳນຳອີກ. ນອກຈາກນັ້ນ ຄະນະອັກສອນສາດຍັງມີສາຍພົວພັນຮ່ວມມືກັບຫຼາຍໆປະເທດ ແລະຫຼາຍອົງ ການຈັດຕັ້ງສາກົນ. ເພື່ອເພີ່ມປະສິດ ທິພາບໃນການຮຽນ-ການສອນຂອງຄູອາຈານກໍຄືນັກສຶກສາໄດ້ຮັບທຶນໄປເຝິກງານ, ຮຽນຕໍ່, ຄົ້ນຄວ້າ ໂດຍໄດ້ຮັບການຊ່ວຍເຫຼືອ ຈາກບັນດາປະເທດ ແລະອົງການຈັດຕັ້ງດັ່ງກ່າວ, ພ້ອມດຽວກັນນີ້ ຄະນະອັກ ສອນສາດຂອງພວກເຮົາຍັງໄດ້ຮັບນັກເຝິກງານ, ນັກສຶກສາຈາກຫຼາຍໆປະເທດ ແລະຍັງໄດ້ສົ່ງອາຈານລາວໄປສອນໃນ ບາງປະເທດ ອີກເຊັ່ນ: ປະເທດຫວຽດນາມ, ຈີນ, ກຳປູເຈຍ, ມຽນມາ, ບຣູໄນ, ໄທ, ຢີ່ປຸ່ນ, ອົດສະຕຣາລີ, ຝະລັ່ງ ແລະ ປະເທດອື່ນໆ ອີກ.

ຄະນະອັກສອນສາດໄດ້ເຮັດໜ້າທີ່ສິດສອນພາສາລາວ ແລະພາສາຕ່າງໆປະເທດຫຼາຍພາສາເຊິ່ງບັນຈຸເຂົ້າໃນພາກວິຊາ ຕ່າງໆເຊັ່ນ: ພາກວິຊາພາສາລາວ-ສື່ສານມວນຊົນ, ພາກວິຊາພາສາອັງກິດ, ພາກວິຊາພາສາຝະລັ່ງ, ພາກວິຊາພາສາ ຈີນ, ພາກວິຊາພາສາເກົາຫຼີ, ພາກວິຊາພາສາຍີ່ປຸ່ນ, ພາກວິຊາພາສາເຢຍລະມັນ ແລະພາກວິຊາ ພາສາຫວຽດນາມ. ປະຈຸບັນກຳລັງສ້າງຫຼັກສູດເພື່ອສ້າງເປັນພະແນກພາສາແອັດສະປາຍໂຍນໂດຍການຮ່ວມມືກັບຊ່ຽວຊານກຸຍບາ. ນອກຈາກນີ້ຍັງມີ ສູນພາສາອັງກິດລາວ-ອິນເດຍ ແລະກຳລັງກະກຽມສ້າງສູນພາສາລັດເຊຍ, ຄາດວ່າປີ 2012 ຈະໄດ້ເປີດໃຫ້ມີການຮຽນ-ສອນ ພາສາດັ່ງກ່າວ.

ພາຍໃຕ້ການຊີ້ນຳນຳພາຂອງຄະນະພັກຮາກຖານ, ຄະນະບໍດີຄະນະອັກສອນສາດ, ຈຶ່ງເຮັດໃຫ້ການປະຕິບັດໜ້າທີ່ສິດ ສອນ ແລະຮໍ່າຮຽນພາສາຕ່າງປະເທດ ຕະຫຼອດຮອດການເຄື່ອນໄຫວວຽກງານພື້ນຖານໂຄງລ່າງມີຄວາມຄ່ອງຕົວ ແລະເຮັດ ໃຫ້ຖັນແຖວຄູ-ອາຈານ, ພະນັກງານມີຄວາມສາມັກຄີເປັນເອກະພາບເຊິ່ງສະແດງອອກໃນການເອົາໃຈໃສ່ໜ້າທີ່ວຽກ ງານບັນລຸຜົນ ສຳເລັດແຕ່ລະດ້ານເປັນກ້າວໆມາ.

ດັ່ງນັ້ນ, ເພື່ອເປັນການປະຕິບັດຕາມແຜນຍຸດທະສາດການສຶກສາຂອງພັກວາງອອກໃຫ້ບັນລຸຕາມຈຸດປະສົງເປົ້າໝາຍ, ຄະນະອັກສອນສາດຕ້ອງໄດ້ເລັ່ງໃສ່ການປັບປຸງຄຸນນະພາບການສຶກສາດ້ານພາສາສາດໃຫ້ນັບມື້ນັບດີຂຶ້ນ ເປັນຕົ້ນແມ່ນການປັບ ປຸງໂຄງການຫຼັກສູດ, ການປັບປຸງຄຸນນະພາບຂອງຄູ ແລະເອົາໃຈໃສ່ສຶກສາອົບຮົມແນວຄິດຂອງນັກສຶກສາຕໍ່ກັບການຮຽນ ຮູ້ພາສາຕ່າງປະເທດຈະຕ້ອງຄຽງຄູ່ກັບການປົກປັກຮັກສາວັດທະນະທຳຂອງຊາດໄວ້ຢ່າງໝັ້ນຄົງ.

ໃນພາລະກິດປົກປັກຮັກສາ ແລະສ້າງສາພັດທະນາປະເທດຊາດ, ການຮຽນຮູ້ດ້ານພາສາຕ່າງປະເທດແມ່ນມີຄວາມຈຳ ເປັນຢ່າງພາວະວິໃສ, ເນື່ອງຈາກພາສາຕ່າງປະເທດຈະເຮັດໃຫ້ພວກເຮົາປະສານງານ ແລະພົວພັນຮ່ວມມືກັບບັນດາປະເທດທີ່ ມີຄວາມສີວິໄລດ້ານເຕັກໂນໂລຊີກວ້າງໄກໄດ້ດີຂຶ້ນ, ສາມາດສ້າງຄວາມສົນໃຈໃນການດຶງດູດຊາວຕ່າງຊາດມາລົງທຶນຢູ່ລາວນັບມື້ ນັບດີຂຶ້ນ ແລເຮັດໃຫ້ເສດຖະກິດລາວມີທ່ວງທ່າກ້າວຂະຫຍາຍຕົວ.

ມະຫາວິທະຍາໄລແຫ່ງຊາດ, ຄະນະອັກສອນສາດ ( ວິທະຍາເຂດດົງໂດກ ); ຕູ້ ປ.ນ: 7322
ໂທລະສັບ : ( +856-21 ) 740276, 740277 ; ໂທລະສານ: ( +856-21 ) 740277 ; ອີເມວ: ອີເມລນີ້ຈະຖືກປ້ອງກັນຈາກສະແປມບອດ ແຕ່ທ່ານຕ້ອງເປີດການໃຊ້ງານຈາວາດຄິບກ່ອນ